~ શ્રી નૂતન સૌરાષ્ટ્ર

પોરબંદર,તા.૨૪

કુતિયાણા અને પોરબંદર તાલુકા પંચાયતની ૯ પૈકી ૭ બેઠક ભાજપને ફાળે ગઇ છે જયારે કોંગ્રેસના ફાળે બે સીટ આવી છે.

પોરબંદર જીલ્લાના કુતિયાણા તાલુકા પંચાયતની ૮ ગામની પેટા ચુંટણી આજે યોજાતા તેમાંથી ૬ ભાજપને અને ર કોંગ્રેસને મળેલી છે જયારે પોરબંદર તાલુકા પંચાયતની એક બેઠક પણ રાતિયા ગામની ભાજપે જીતી લીધી છે.

કુતિયાણા તાલુકા પંચાયતની પેટા ચુંટણીમાં છ ગામમાં ભાજપની જીત થઇ છે તેમાં ખાગેશ્રી, કોટડા, ચૌટા, દેવડા, કડેગી, મહોબતપરા, રોઘડા અને સિંધપુરનો સમાવેશ થાય છે જયારે કોંગ્રેસના ભાગે ચૌટા અને દેવડા ગામની એક-એક બેઠક મળીને બે બેઠક માં જીત થઇ છે. આ રીતે કુતિયાણા તાલુકા પંચાયતમાં અને પોરબંદર તાલુકા પંચાયતમાં ભાજપે પોતાની બહુમતિ જાળવી રાખી છે.

ભાજપની જહેમત રંગ લાવીપોરબંદરના ધારાસભ્ય બાબુભાઇ બોખીરીયા સહિત શહેર-જીલ્લા યુવા ભાજપના આગેવાનો વગેરેની જહેમતને લીધે ફરીથી ભાજપનો ભગવો તાલુકા પંચાયતોમાં લહેરાયો છે. રાતિયા સીટના ઉમેદવાર રણમલભાઇ રાતિયાને જીલ્લા ભાજપ પ્રમુખ વિક્રમભાઇ ઓડેદરા સહિત ભીમભાઇ ઓડેદરા અને આગેવાનોએ બિરદાવીને શુભેચ્છા આપી હતી

~ શ્રી નૂતન સૌરાષ્ટ્ર

ઉના, તા.૨૪

ઉના તાલુકાનાં સીમર ગામ આગળ સૈયદ રાજપરા જતા રોડ પાસે સીતળા માતાજીનાં મંદિર પાસે ઉનાનાં પોલીસ મેહુલભાઈ પ્રતાપભાઈ ત્થા સ્ટાફે એક વાદળી કલરની જીપ નંબર જીજે૧૦એફ ૨૬૨૭ ને રોકાવી તપાસ કરતા વિજયસિંહ ગંભીરસિંહ રાઠોડ, મહેન્દ્રસિંહ નારૂભાઈ રાઠોડ, શૈલેષભાઈ બાબુભાઈનાં કબ્જામાંથી પરપ્રાંતની ભારતીય બનાવટની ઈંગ્લીશ દારૂ નંગ ૧૦૦ નંગ ત્થા બીયર ટીન નંગ ૪૦ મળી કુલ રૂા.૧ લાખ ૧૫ હજારનાં મુદામાલ સાથે પકડી ઉના લાવી ગુનો દાખલ કરી ધરપકડ કરી હતી.

~ શ્રી નૂતન સૌરાષ્ટ્ર

ભુજ, તા.૨૪

પશ્ચિમ કચ્છ પોલીસ દળના આસિ.બસ ઈન્સ્પેકટર ઉમર ઈસ્માઈલ નોડે (ઉ.વ.૫૦)એ ભુજમાં તેમના નિવાસસ્થાન કેમ્પ એરીયા નજીક લાલ બંગલો તરીકે ઓળખાતી ખંડેર ઈમારતમાં ગળેફાંસો ખાઈ આપઘાત કરી લીધો છે. આજે બપોરના અરસામાં આ બનાવ બન્યો હતો. ઘટના અંગે જાણ થતા ભુજ બી.ડીવીઝન પીઆઈ એમ.જે.જલુ સહિતનો સ્ટાફ ઘટના સ્થળે દોડી ગયો હતો અને મૃતદેહને પોસ્ટમોર્ટમ અર્થે જી.કે.જનરલ હોસ્પિટલ મોકલી આપ્યો હતો.

મૃતક ઉમર નોડે લાંબા સમયથી એસ.પી. ઓફિસમાં એમઓબી શાખામાં ફરજ બજાવતા હતા. તાજેતરમાં જ વિવિધ પોલીસકર્મીઓની થયેલી સામુહિક બદલી અંતર્ગત તેમની મુંદ્રા મરીન પોલીસ મથકમાં ટ્રાન્સફર થઈ હતી. તેમના આપઘાત અંગેનું ચોક્કસ કારણ બહાર આવ્યું નથી. પરંતુ અંતરંગ સુત્રોએ બનાવ પાછળ પારિવારીક સમસ્યાઓ હોવાની શકયતા વ્યકત કરી છે. તેમનો એક પુત્ર ઘણા સમયથી માનસિક અસ્વસ્થ છે અને અન્ય એક સંતાનને હાઈ ડાયાબીટીસ છે. જે બાબતને લઈ તે સતત ચિંતિત અને અસ્વસ્થ રહેતા હતા. ભુજ બી.ડીવીઝન પોલીસે બનાવ અંગે તપાસ શરૂ કરી છે.

~ શ્રી નૂતન સૌરાષ્ટ્ર

ધારી, તા.૨૪

ધારીમાં આર્ટ ઓફ લીવીંગ બેંગ્લોર આશ્રમના ટ્રેનીંગ લીધેલા ડો.કાનનબેન શર્મા દ્વારા નાડી પરીક્ષણ ચિકિત્સક તપાસ કેમ્પ રાખવામાં આવેલ છે. ધારીમાં તા.૨૭ ને શનિવારના રોજ સમય ૨ વાગ્યાથી સાંજનાં ૬ વાગ્યા સુધીના સમય દરમ્યાન રાખવામાં આવેલ છે. આ નાડી પરીક્ષણમાં નાના બાળકથી લઈને વૃઘ્ધ વ્યકિત નાડી પરીક્ષણ તપાસ કરાવી શકે છે. નાડી પરીક્ષણ દ્વારા એક સચોટ અને નુકશાન વગરની યોગ નિદાન પઘ્ધતિ છે. નાડી પરીક્ષણ કરાવવાથી શરીરમાં રોગ પ્રવેશ શરૂ થવાની સાવચેતી આપે છે. આ નાડી પરીક્ષણ રૂષી પરંપરાથી ચાલી આવતી નિદાન પઘ્ધતિ છે. નાડી પરીક્ષણ દ્વારા તમારી વાત પીત કફ જાણી શકાય છે. નાડી પરીક્ષણ દ્વારા રકતવિહાર, ચામડીના રોગો, જાડાપણુ, માનસીક તણાવ, હરસ, મસા, ડાયાબીટીસ, હાથ પગના દુખાવો, સાંધાના દુખાવા, એસીડીટી, ગેસ, કબજીયાત, બ્લડપ્રેસર, વાય નબળાઈ અનિયમીત માસીક ધર્મ, માથાનો દુઃખાવો, અનિંદ્રા જેવી અનેક બીમારીઓનું બાળકો તેમજ સ્ત્રી-પુરૂષ કોઈ પણ ઉંમરના વ્યકિત નાડી પરીક્ષણ દ્વારા સફળ આયુર્વેદિક નિદાન કરાવી શકે છે. આ નાડી પરીક્ષણનુ નિદાન ભુખ્યા પેટે અથવા જમ્યાના બે કલાક પછી કરાવી શકાય છે. નાડી પરીક્ષણની નિદાન અગાઉથી નામ નોંધાવવું. રજીસ્ટ્રેશન કરાવવુ જરૂરી છે. આ નાડી પરીક્ષણમાં ના લખાવવા ધારીના પત્રકાર કાંતિભાઈ જોષી મહાદેવ પરફયુમ, ક્રિષ્ના કોમ્પ્લેક્ષ ધારી મોબાઈલ નં.૯૯૭૯૭૧૬૯૧૫ આ નંબર ઉપર વહેલાસર નામ લખાવવું.

~ શ્રી નૂતન સૌરાષ્ટ્ર

ભુજ, તા.૨૪

વરસાદી પાણીમાં ડુબી જવાથી વધુ એક માસુમ બાળકે જીવ ગુમાવ્યો છે. ભુજના સરપટ નાકા બહાર રેલવે ક્રોસીંગ નજીક આવેલા આશાપુરાનગરમાં પાણી ભરેલા ખાડામાં ડુબી જતા પાંચ વર્ષની આરતી મુન્નાભાઈ જોગી નામની બાળકીનું મોત નીપજ્યું છે. ગઈકાલે સાંજે સાડા છ વાગ્યાના અરસામાં આ દુર્ઘટના ઘટી હતી. જે અંગે રાત્રે જાણ થઈ હતી. મૃતક આરતી જોગીવાસમાં બાળકો સાથે રમી રહી હતી. દરમ્યાન નિર્માણાધીન મંદિરના પાયામાં ભરાયેલા વરસાદી પાણીમાં તે પડી ગઈ હતી.

રાત સુધી બાળકી ઘરે પરત ન આવતા માતા-પિતાએ શોધખોળ હાથ ધરતા રાત્રે તેનો મૃતદેહ મળી આવ્યો હતો. દુર્ઘટના અંગે ભુજ એ.ડીવીઝન પોલીસે આકસ્મિક મોતની નોંધ પાડી તપાસ હાથ ધરી છે. ઉલ્લેખનીય છે કે ગઈકાલે સાંજે નખત્રાણા તાલુકાના લૈયારીમાં તળાવના ખાડામાં બે માસુમ માસિયાઈ ભાઈના ડુબી જતા મોત નીપજ્યાં હતા.

~ શ્રી નૂતન સૌરાષ્ટ્ર

ગીરગઢડા, તા.૨૪

ગુજરાત રાજ્યનાં નવનિયુકત રાજ્યપાલ આચાર્ય દેવવ્રતજી પદારૂઢ થયા બાદ સૌ પ્રથમ એસજીવીપી કેમ્પસમાં આવેલ વિશાળ ગૌશાળાના દર્શન કરવા પધાર્યા હતા. સંસ્થા વતી પરમ પૂજ્ય બાલકૃષ્ણદાસજી સ્વામી, ઈન્ટરનેશનલ સંકુલના ડાયરેકટર જયદેવભાઈ સોનગરા, સંતો તથા ઋષિકુમારોએ રાજ્યપાલનું વેદમંત્રોના ઉચ્ચાર સાથે ભાવભીનું સ્વાગત કર્યું હતુ.

રાજ્યપાલ સંસ્કૃત, સંસ્કૃતિ અને ગૌપ્રેમી છે. ગુરૂકુલ પરંપરા એમને ખૂબજ ગમે છે. પદારૂઢ થયા બાદ એમના હૃદયની ઈચ્છા ગાયોના દર્શન કરી આશીર્વાદ મેળવવાની હતી. જેથી તેઓ એસજીવીપી કેમ્પસમાં ગીર ગાયોના દર્શને પધાર્યા હતા અને ગૌપુજન કર્યું હતુ.

સાથે સાથે તેઓએ કેમ્પસમાં જ આવેલી અત્યાધુનિક સાધનોથી સજ્જ અને એલોપેથી, આયુર્વેદ અને યોગના સંગમ સાથે કાર્યરત એસજીવીપી હોલિસ્ટિક હોસ્પિટલની મુલાકાત લીધી હતી. એ ઉપરાંત દર્શનમ્‌ સંસ્કૃત મહાવિદ્યાલયની મુલાકાત લઈ વેદ અને વૈદિક વિષયોનો અભ્યાસ કરી રહેલા ઋષિકુમારોને શુભકામના પાઠવી હતી અને કહ્યું હતું કે આટલું સુંદર વેદોનું ગાન સાંભળી મારું હૃદય પ્રસન્ન થઈ રહ્યું છે.

આ પ્રસંગે માનનીય રાજ્યપાલે જણાવ્યું હતું કે હું આ પહેલા પણ ગુરૂકુલની ગૌશાળાના દર્શને આવી ચુકયો છું. ગુરૂકુલ દ્વારા સંચાલિત ગૌશાળા, પાઠશાળા અને ઔષધાલયને જોઈને અત્યંત હર્ષ થાય છે. અહીંના સંતો દ્વારા આજની યુવા પેઢીને સંસ્કારિત કરવાના પ્રયત્નો અત્યંત પ્રસંશનીય છે. હું આ સંસ્થા સાથે હૃદયથી જોડાવા તત્પર છું. ઉપરાંત તેઓએ દ્રોણેશ્વર ગુરૂકુલ ખાતે બિરાજમાન સંસ્થાનાં અઘ્યક્ષ માધવપ્રિયદાસજી સ્વામી સાથે ટેલીફોનીક વાત કરી હતી અને પોતાના હૃદયના ઉદ્‌ગારો જણાવ્યા હતા કે ગુજરાતમાં મારે ગૌસંસ્કૃતિ અને ગૌ આધારિત ઓર્ગેનિક ખેતીનો વિકાસ કરવાની ઈચ્છા છે. સ્વામીએ જણાવ્યું હતુ કે આપના આ અભિયાનમાં ગુરૂકુલ સદૈવ આપની સાથે રહેશે.

~ શ્રી નૂતન સૌરાષ્ટ્ર

કોડીનાર, તા.૨૪

અમીત જેઠવા હત્યા કેસમાં સજા પામેલા માજી સાંસદ દિનુ સોલંકી તેના ભત્રીજા શિવા સોલંકી, શૈલેષ પંડયા, ઉદાજી ઠાકોર, શિવા પાંચણ, બહાદુર વાઢેળ અને સંજય ચૌહાણને સીબીઆઈ કોર્ટે આજીવન કેદની સજા ફટકારી છે અને હાલ આ તમામ આરોપી સાબરમતી સેન્ટ્રલ જેલમાં છે ત્યારે આ તમામને ફાળવેલા કેદી નંબર તેઓને રાખવામાં આવેલા બેરેક નંબર તેમજ તેઓને મળવા આવનારા મુલાકાતીઓના નામ, સરનામા અને ગામનાં નામ સહિતની વિગતો માહિતી અધિકાર હેઠળ માંગી છે. આ ઉપરાંત આ તમામ આરોપીઓને જે બેરેકમાં રાખવામાં આવ્યા હોય તેની સામે રાખેલા સીસીટીવી કેમેરાનાં આજદીન સુધીના ફુટેજની સીડી તેમજ જેલનાં કેદી અંગે સરકાર દ્વારા બહાર પાડેલા ઉત્તરોતર તમામ પરિપત્રોની નકલ પણ માંગી છે.

~ શ્રી નૂતન સૌરાષ્ટ્ર

કોડીનાર, તા.૨૪

કોડીનારના આરટીઆઈ કાર્યકર્તા મહેશભાઈ મકવાણાએ પ્રાદેશીક કમીશ્નર નગરપાલીકા કચેરી ભાવનગરને એક પત્ર પાઠવી કોડીનાર નગરપાલિકાના સદસ્ય અને ઉપપ્રમુખ પ્રતાપભાઈ ઉર્ફે શિવાભાઈ સોલંકીનું સભ્યપદ રદ્‌ કરવા માંગણી કરી છે.

પત્રમાં મહેશભાઈ મકવાણાએ જણાવ્યું છે કે શિવાભાઈ સોલંકીને આરટીઆઈ એકટીવીસ્ટ અમીત જેઠવાના ખુન કેસમાં સોલા હાઈકોર્ટ પોલીસ સ્ટે.ફસ્ટ ગુના રજી નં.૧૬૩/૧૦ તા.૨૦/૭/૧૦ થી નોંધાયેલા કેસમાં સી.બી.આઈ. કોર્ટે ભારતીય દંડ સંહિતાની કલમ ૩૦૨ સાથે કલમ ૧૨૦ બી મુજબ તકસીરવાન ઠરાવી આજીવન કેદની સજા તથા રૂા.૧૫ લાખનો દંડ કરેલ છે. જેથી હાલ શિવાભાઈ સોલંકી સાબરમતી જેલમાં છે ત્યારે સુપ્રિમ કોર્ટની ગાઈડ લાઈન તથા સરકારના વખતો વખતનાં પરીપત્રો તથા મ્યુનિ.એકટની જોગવાઈ મુજબ તેમનુ કોડીનાર નગરપાલીકાના સભ્ય તરીકેનુ પદ રદ કરવા રજુઆત કરી છે.

~ શ્રી નૂતન સૌરાષ્ટ્ર

સુરેન્દ્રનગર, તા.૨૪

સુરેન્દ્રનગર જીલ્લાનાં ધ્રાંગધ્રા રેલ્વે ફાટક પાસે તેમજ મોચીવાડ ત્રણ રસ્તા પાસેથી બાઈક ચોરીનાં ગુનામાં એલસીબીએ ૪ શખ્સની ધરપકડ કરી બે બાઈક કબ્જે કર્યા છે.

પોલીસ પ્રાપ્ત વિગત મુજબ ધ્રાંગધ્રાના ધોળીધાર ગામે રહેતો માલા કરશન ભરવાડ નામનો શખ્સ ચોરાઉ બાઈક સાથે રેલ્વે ફાટક પાસેથી પસાર થતા એલસીબીના સ્ટાફે અટકાવી બાઈકનાં કાગળો વિષે પુછપરછ કરતા તેણે ત્રણ વર્ષ પહેલા અમદાવાદ સેટેલાઈટમાંથી બાઈકની ચોરી કર્યાની કબુલાત આપી હતી. જ્યારે ધ્રાંગધ્રાનાં જુની મોચીવાડ ત્રણ રસ્તા પાસે એલસીબીએ વાહન ચેકીંગ દરમ્યાન એકટીવા લઈને નીકળેલા અતુલ રમેશ અજાણી, દશરથ જગદીશ કોળી અને અજય લાલજી ઝીંઝુવાડીયાની અટકાયત કરી એકટીવાનાં કાગળો વિષે પુછપરછ કરતા તેણે ૭ માસ પૂર્વે ખેરવા ગામની સીમમાંથી ચોરી કર્યાની કબુલાત આપતા રૂા.૪૦ હજાર કિંમતની એકટીવા કબ્જે કરી ચારેય સામે ધ્રાંગધ્રા સીટી પોલીસ મથકમાં ગુનો નોંધી વધુ તપાસ હાથ ધરી છે.

~ શ્રી નૂતન સૌરાષ્ટ્ર

ભાવનગર, તા.૨૪

ભાવનગર જીલ્લાનાં તળાજા તાલુકાનાં ઘાટરવાળા ગામે ૭ માસ પૂર્વે થયેલી લુંટનો એલસીબીએ ભેદ ઉકેલી ભાગ્યું જમીન વાવતા શ્રમીકે દંપતી પર તીક્ષ્ણ હથીયાર વડે હુમલો કરી સોનાની લુંટ ચલાવ્યાની કબુલાત આપતા પોલીસે બે લુંટનાં ભેદ ઉકેલ્યા છે.

પોલીસ પ્રાપ્ત વિગત મુજબ તળાજા તાલુકાના ઘાટરવાળા ગામે રહેતા માધવજીભાઈ કાશીરામ પનોત તેમના પત્નિ શાંતુબેન પોતાની વાડીએ હતા ત્યારે ગત તા.૧૫/૯/૧૮ ના રોજ હુમલો કરી ચલાવેલી લુંટનો આરોપી અશોક હાકા પરમાર તળાજાના રવાપરી ગામ પાસે છુપાયો હોવાનુ એલસીબીના સ્ટાફને મળેલી બાતમીના આધારે પી.એસ.આઈ. એન.જી.જાડેજા સહિતના સ્ટાફે ધરપકડ કરી પ્રાથમીક પુછપરછમાં તે માધવજીભાઈની જમીન વાવતો હોવાથી દંપતી એકલા રહેતા હોવાથી લુંટ કરી તીક્ષ્ણ હથીયારના ઘા ઝીંકી હત્યાની કોશીષ કરી હતી. તેમજ વધુ તપાસમાં એક વર્ષ પહેલા તળાજા તાલુકાનાં જાલવદર ગામે ગુલીભાઈની વાડીમાં બંધ મકાનનાં તાળા તોડી સોના-ચાંદીના દાગીની ચોરી કરી કબુલાત આપતા પોલીસે આ અંગે અશોક પરમારની ધરપકડ કરી વધુ તપાસ હાથ ધરી છે.

~ શ્રી નૂતન સૌરાષ્ટ્ર

ગીરગઢડા, તા.૨૪

આજરોજ ડીઝાસ્ટર ઓફીસર ગીરસોમનાથ કે.એસ.ત્રીવેદીના અઘ્યક્ષસ્થાને એનડીઆરએફના માનનિય કે.કમાન્ડન્ટ ઓફીસર આર.એસ.જુનનાં નિદર્શન અનુસાર ગીરગઢડા તાલુકાનાં એનડીઆરએફની ટીમનાં કેન્દ્રીય નીરીક્ષક કમલેશ કરેડના નેતૃત્વ હેઠળ ગીરગઢડા તાલુકાની તમામ શાળાના બાળકોને તેમજ ગીરગઢડા યુવા ટીમને કુદરતી આપદા પુર હોનારત, આગ, ભુકંપ જેવી વિવિધ આપદાઓમાં કઈ રીતે કયા કયા સાધન સામગ્રીનો ઉપયોગ કરી સહેલાઈથી બચાવી શકાય તે માટેની જાણકારી આપવામાં આવી હતી ને કોઈપણ આપદા વખતે સાધનનો કોઈ રીતે ઉપયોગ કરીને લોકોને બચાવવા મદદરૂપ થઈ શકાય તે માટે લાઈવ ડેમો કરી એનડીઆરએફની ટીમ દ્વારા તમામ બાળકોને માહીતગાર કરેલ. આ કાર્યક્રમમાં ગીરગઢડા મામલતદાર, ટીડીઓ, પીએસઆઈ તેમજ ગીરગઢડાની તમામ શાળાના આચાર્ય અને બાળકો યુવા ટીમ ખાસ ઉપસ્થિત રહેલ.

~ શ્રી નૂતન સૌરાષ્ટ્ર

પોરબંદર, તા.૨૪

પોરબંદર સુન્ની મુસ્લીમ સમાજની મોટી જમાતો પૈકી સુન્ની સમાજની સંધી સુન્ની મુસ્લીમ જમાત (મોટી)ના પ્રમુખની તાજેતરમાં યોજાયેલ ચુંટણીમાં આરીફભાઈ હાલાઈપૌત્રા બીનહરીફ ચુંટાયા છે. જનાબ આરીફભાઈ હાલાઈપૌત્રા છેલ્લા ત્રણ વર્ષથી સંધી સુન્ની મુસ્લીમ જમાતનું પદ શોભાવી રહયા છે. તેઓ અને તેમની સમગ્ર કારોબારીની શ્રેષ્ઠ અને સેવાકીય કામગીરીની સમગ્ર સમાજમાં પ્રશંસાને પાત્ર હતી. તાજેતરમાં સંધી સુન્ની મુસ્લીમ જમાત (મોટી)ની ચુંટણી યોજવામાં આવેલ જેમાં આરીફભાઈ હાલાઈપૌત્રાએ ફરીવાર પ્રમુખપદ માટે ઉમેદવારી નોંધાવેલ. સમય મર્યાદા પુરી થયા સુધી અન્ય કોઈ જમાતીભાઈએ ઉમેદવારી પત્રક ન ભરતા તેઓને બીનહરીફ વિજેતા જાહેર કરી પાંચ વર્ષ માટે પ્રમુખપદના સ્થાને નિમણુંક કરવામાં આવેલ તેઓને સુન્ની અંજુમને-ઈસ્લામ અને અન્ય જમાતો દ્વારા શુભેચ્છા આપવામાં આવેલ.

~ શ્રી નૂતન સૌરાષ્ટ્ર

ભાવનગર,તા.૨૪

ભાવનગર શહેરના મામાકોઠા રોડ પર આવેલ ન.પ્ર.શિ.સ.સંચાલિત અંબિકા પ્રાથમિક શાળાના એક શિક્ષકે ધોરણ-૫ની વિદ્યાર્થીનીઓને મોબાઇલમાં બિભત્સ ફોટા અને વીડિયો દેખાડયાની વાતને લઇ સવારથી જ વાલીઓને શાળાએ જઇ હોબાળો મચાવી મૂક્યો હતો અને શાળામાં જ શિક્ષકને મારી પોલીસના હવાલે કર્યો હતો. પોલીસે આરોપી શિક્ષક સામે પોસ્કો સહિતની કલમ અન્વયે ગુન્હો નોંધી અટક કરી ધોરણસરની કાર્યવાહી હાથ ધરી હતી.

સંસ્કારી નગરી ભાવનગર અને શિક્ષક જગતને લાંછન લગાવતી ચકચારી ઘટનાની વિગત એવી છે કે, શહેરના મામાકોઠા રોડ પર આવેલ નગર પ્રાથમિક શિક્ષણ સમિતિ સંચાલિત શાળા નં.૭ અંબિકા પ્રા.શાળામાં શિક્ષક તરીકે ફરજ બજાવતા દિશાન્ત રસીકભાઇ મકવાણા શાળામાં ધોરણ-૫માં અભ્યાસ કરતી વિદ્યાર્થીઓને શાળામાં રિશેષના સમયમાં મોબાઇલમાં બિભત્સ ફોટા અને ફિલ્મો બતાવતો હતો અને જો કોઇને આ વાત કોઇને કહી તો નાપાસ કરવાની ધમકી આપી હતી.

આ બનાવ અંગે નિલમબાગ પોલીસમાં એક ભોગગ્રસ્ત વિદ્યાર્થીનીના પિતાએ ફરિયાદ નોંધાવતા પોલીસે આરોપી શિક્ષક સામે આઈપીસી કલમ ૩૨૩, ૩૫૪(એ), પોસ્કો કલમ ૧૨૯(૧૮) તથા જુવેનાઇલની કલમ ૭૫ અન્વયે ગુનો નોંધી તેની ધોરણસરની કાર્યવાહી હાથ ધરી હતી. આ બનાવે શહેરભરમાં ભારે ચકચાર જગાવી હતી.

શાળામાં વિદ્યાર્થીનીઓ સાથે કથિત દુર્વ્યવહાર કરનાર લંપટ શિક્ષક શાળામાં અંદાજે ૧૫ દિવસથી વિદ્યાર્થીનીઓ સાથે આ પ્રકારનો વ્યવહાર કરતો હોવાનો વાલીઓએ આક્ષેપ કર્યો હતો. જો કે, હાલ પોલીસ ફરિયાદ થઇ હોવાના કારણે પોલીસે તપાસના આધારે કાર્યવાહી કરવામાં આવશે તેમ જણાવ્યું હતું.

~ શ્રી નૂતન સૌરાષ્ટ્ર

જુનાગઢ,તા.૨૪

રાજદ્રોહના કેસમાં કોર્ટમાં હાજરી આપવા આવેલા હાર્દિક પટેલે સુરતમાં જૂનાગઢ મ્યુનિસિપલ કોર્પોરેશનની ચૂંટણીમાં કોંગ્રેસ પાર્ટીની કારમી હાર વિશે નિવેદન આપ્યું હતું. હાર્દિક પટેલે કહ્યું હતું કે કોંગ્રેસ પાર્ટી ઉમેદવારો ઉતારવામાં કાચી પડી હશે, પાર્ટી ભાજપના ભ્રષ્ટાચારને ખુલ્લો પાડવામાં નિષ્ફળ રહી.

હાર્દિક પટેલે કહ્યું, ’છેલ્લી ત્રણ વખતથી કોર્પોરેશનમાં ભાજપ જીતે છે એટલે તે કોંગ્રેસનો ગઢ ન કહી શકાય. અમે ઉમેદવારોની પસંદગી કરવામાં ભૂલ કરી છે, અને ક્યાંકને ક્યાંક ભારતીય જનતા પાર્ટીના ભ્રષ્ટાચારને ખુલ્લો પાડવામાં નિષ્ફળ નીવડ્યા છે. જૂનાગઢમાં ચોક્કસપણે અમારા ધારાસભ્ય છે પરંતુ પાર્ટી ઉમેદવારોની પસંદગીમાં કાચી પડી છે. ”

હાર્દિકે મીડિયા સમક્ષ કહ્યું કે લોકશાહીમાં હાર જીત ચાલ્યા કરે છે અને આ ચૂંટણીએ છેલ્લી ચૂંટણી નથી હજુ આગામી સમયમાં વર્ષ ૨૦૨૦માં પણ ચૂંટણીઓ આવવાની છે અને વર્ષ ૨૦૨૨માં પણ વિધાનસભાની ચૂંટણી આવશે પાટીદારો કોના તરફે છે એ ચૂંટણીમાં સાબિત થઈ જશે.

હાર્દિક પટેલે જણાવ્યું હતું કે એક સમયે ભારતીય જનતા પાર્ટીની દેશમાં બે જ બેઠકો હતી અને આટલા વર્ષો પછી આજે દેશમાં તેમની સરકાર છે. તો આ પ્રકારની જીતને ધ્યાનમાં રાખીને કોંગ્રેસને ડૂબતું નાવ ગણાવું યોગ્ય નથી. વિજય રૂપાણી ભૂલી ગયા છે કે તેઓ પ્રદેશના પ્રવક્તામાંથી સીધા સીએમ બની ગયા જો એ શક્ય બની શકતું હોય તો કાલે એવું પણ બની શકે છે કે દેશના ૩૨માંથી ૪ રાજ્યમાં જ ભાજપનું સાશન બચે.

~ શ્રી નૂતન સૌરાષ્ટ્ર

જુનાગઢ,તા.૨૪

જૂનાગઢ મહાનગર સેવાસદનની ચૂંટણીમાં ભારતીય જનતા પાર્ટીનો ભવ્ય વિજય થયો હતો. ૫૯ બેઠકોની મનપામાં ભાજપે ૫૪ બેઠકો જીતતા પરિણામ જાહેર થયાના ૨૪ કલાકમાં જ સીએમ રૂપાણી અને ભાજપના પ્રદેશ અધ્યક્ષ વાઘાણી જૂનાગઢ આવ્યા હતા. શહેરની બાહુદ્દીન કોલેજના પટાંગણમાં યોજાયેલી વિજયોત્સવ સભાને સંબોધતા મુખ્ય મંત્રી રૂપાણીએ જણાવ્યું હતું કે આટલી મોટી જીત બાદ અમારી જવાબદારી પણ વધે છે. જૂનાગઢની જનતાએ અમારા પર વિશ્વાસ મૂકીને જે આપ્યું છે તેના કરતા સવાયું વિકાસ કરી અને પરત આપીશું.

વિજય રૂપાણીએ જણાવ્યું, “લોકસભાની ચૂંટણીમાં ૨૬ બેઠકો જીતી અને જૂનાગઢની જનતા છપ્પરફાડીને મત આપીને ભાજપની ઝોળી છલકાવી દીધો છે. જૂનાગઢની જનતાએ કોઈ પણ જાતના ભ્રામક પ્રચારમાં આવ્યા વગર ભાજપને મત આપ્યો છે. હું જનતાને ભરોસો આપવા આવ્યો છું, તમે જે ભરોસો મૂક્યો છે તે એળે નહીં જાય, તમે જે ઋણ અદા કર્યુ છે તેનાથી સવાયું પાછું આપીશું. મુખ્ય મંત્રી તરીકે વિશ્વાસ અપાવું છું. જૂનાગઢને જે જોઈએ તે આપીશું. પૈસા આપીને અને વિકાસ કરીશું.”

સીએમ રૂપાણીએ જણાવ્યું હતું કે કોંગ્રેસના લોકો હાર સ્વીકારવાના બદલે લોકોને ગાળો દેવા નીકળા છે. જે પાર્ટી પ્રજાને ગાળો આપે તેનો વિકાસ થતો નથી. કોંગ્રેસ ડૂબતી નાવ છે હવે પ્રજાને વિપક્ષ તરીકે પણ કોંગ્રેસમાં વિશ્વાસ રહ્યો નથી. એક વાર ભૂતકાળમાં આપણે હારી ગયા હતા ત્યારે પ્રજાને ગાળો આપવા નહોતા નીકળ્યા ઉલટાનું વધારે મહેનત કરી અને વધારે સારૂ કામ કરીશું

~ શ્રી નૂતન સૌરાષ્ટ્ર

અમરેલી, તા.૨૪

અમરેલીના રંગપુરમાં જુની અદાવતમાં યુવાન ઉપર એક શખ્સે હથિયાર વડે હુમલો કર્યો હતો. હુમલામાં ગંભીર રીતે ઘવાયેલા યુવાનને સારવાર માટે રાજકોટ ખસેડવામાં આવ્યો હતો.

આ બનાવ અગે પોલીસમાથી જાણવા મળતી વિગત અનુસાર અમરેલીના રગપુરમા રહેતા પ્રવિણ લાલજીભાઈ ડાભી નામના ૩૫ વર્ષના વણકર યુવાન ઉપર જુની અદાવતનો ખાર રાખી મહેશ ડાભી નામના શખ્સે હથિયાર વડે હુમલો કરી બેફામ માર માર્યો હતો.

હુમલામાં ગંભીર રીતે ઘવાયેલા યુવાનને અમરેલી બાદ રાજકોટ સિવિલ હોસ્પિટલમાં ખસેડવામાં આવ્યો છે. આ ઉપરાંત શાપર વેરાવળમાં રહેતો નારણ લખધીરભાઈ દેવીપૂજક (ઉ.૨૫) નામના યુવાન સાથે અજાણ્યા શખ્સોએ ઝઘડો કરી ઢીકા-પાટુનો માર માર્યો હતો.

થાનમાં રહેતા હિતેશ નરેન્દ્રભાઈ પરમાર નામના ૩૦ વર્ષના યુવાન સાથે પણ અજાણ્યા શખ્સોએ ઝઘડો કરી ઢીકા-પાટુનો માર માર્યો હતો. ગંભીર રીતે ઘવાયેલા બન્ને યુવાનોને સારવાર માટે રાજકોટ સિવિલ હોસ્પિટલમાં દાખલ કરવામાં આવ્યા હતા. પોલીસે નોધ કરી વધુ તપાસ આદરી છે.

~ શ્રી નૂતન સૌરાષ્ટ્ર

ભાવનગર, તા.૨૪

અલંગ શિપબ્રેકિંગ યાર્ડના પ્લોટ નં.૧૯ ની સામે ખોલીમાં રહેતા પર પ્રાંતીય યુવાને પોતાના જ હાથે પોતાના ગળા પર છરી ફેરવી દેતા ગંભીર હાલતે અલંગ ૧૦૮ દ્વારા ભાવનગર ખસેડવામાં આવેલ, અલંગ ૧૦૮ પાસેથી બનાવને લગતી વિગતો મુજબ પ્લોટ નંબર ૧૯ સામે ખોલીમાં રહેતા રાજીવકુમાર રામ અકવાન ઉ.વ.૨૬ એ આજે સાંજના સાતેક વાગ્યાના સુમારે પોતાની ખોળીમાં જ ભાઈઓ સાથે બોલાચાલી થતા પોતાની જાતે જ પોતાના ગળામાં છરી મારી દેતા ભાવનગર સિવિલ હોસ્પિટલમાં ખસેડવામાં આવેલ હતો. ભૈયાની સ્થિતિ ગંભીર ગણાવાય રહી છે.

~ શ્રી નૂતન સૌરાષ્ટ્ર

ગીરગઢડા, તા.૨૪

ગીર સોમનાથ જિલ્લામાં પી.જી.વી.સી. દ્રારા સોલાર પમ્પ સેટની યોજનાથી અનેક ખેડૂતોને તેમના ખેતરમાં પાણી વાળવા માટે સોલાર સિસ્ટમથી પાવર મળી રહેશે અને સુત્રાપાડા તાલુકામા-૩૨, તાલાળા તાલુકામા-૫ અને વેરાવળ તાલુકામા-૪ સહિત ગીરસોમનાથ જિલ્લામાં ૪૧ સોલાર પમ્પ સેટની યોજનાનો લાભાર્થીઓને લાભ આપવામા આવ્યો હતો. રુા.૨૫ હજારની આર્થિક રકમ ભરી આ યોજના અંતર્ગત મોટર, સોલાર પેનલ સહિતના સાધનો આપવાની સાથે ૨ વર્ષ માટે મેન્ટેનસ ફી આપવામા આવે છે. મેન્ટેનસની ફરિયાદનો ૪૮ કલાકમાં નિકાલ કરવામા આવ છે. બાદલપરા ગામે રહેતા લાભાર્થી કરશનભાઇ કાનાભાઇ સોલંકીએ જણાવેલ કે, એક વર્ષ પહેલા રુા.૨૫ હજારની રોકડ રકમ ભરવાથી પી.જી.વી.સી.એલ. માંથી સોલાર પમ્પ સેટની યોજના આપવામા આવી હતી જેમાં મોટર, સોલાર પેનલ સહિતના સાધનો આપવામાં આવ્યા હતા ત્યારબાદ મારા ખેતરમાં આ યોજનાના સાધનો ફીટ કરાવામા આવ્યા હતા. સવારે ૧૦ કલાકથી સાંજના ૬ કલાક સુધી સોલાર સિસ્ટરમ આધારિત મોટર ચાલુ રહે છે અને સતત કુવા માથી પાણી ખેચી ખેતરમાં પુરુ પાડવામાં આવે છે. સોલારની ક્ષમતા ૫ એચ.પી.૨૫૦ વોટની છે. સતત દિવસ દરમ્યાન ૮ કલાક સુધી મોટર ચાલુ રહે છે જેથી ખેતીમાં ખુબ લાભ થાય છે અને આ યોજનાથી ખેડૂતોને ખુબ ફાયદો થયો છે તથા હવે રાત્રે પાણી વાળવા જવું પડતું નથી અને લાઇટની ચિંતા રહેતી ન હોવાનું જણાવેલ છે.

તાલુકાક્ષાનો જોબફેર યોજાશે

રમરેચી રોડ પાસે તાલાળા સરકારી આટ્‌ર્સ એન્ડ કોમર્સ કોલેજ તા.૨૬ ના રોજ બપોરે બાર કલાકે તાલુકા કક્ષાના જોબફેરનું આયોજન કરેલ છે જેમાં ખાનગીક્ષેત્રના વિવિધ નોકરીદાતાઓ તરફથી મળેલ વિવિધ જગ્યાઓમાં ધોરણ ૧૦ પાસથી ગ્રેજ્યુએટ પાસ અને ૧૮ થી ૩૫ વર્ષના ઉમેદવારોની ભરતી કરવામાં આવશે તેમ જિલ્લા રોજગાર કચેરીની યાદીમાં જણાવેલ છે.

~ શ્રી નૂતન સૌરાષ્ટ્ર

મીઠાપુર, તા.૨૪

ભાણવડ તાબેના ગડુ ગામે ગત રાત્રીના સમયે એક શખ્સ દ્વારા સંચાલીત જુગારના અખાડામાં પોલીસે ત્રાટકી છ મહિલાઓને સ્કોર્પીયો કાર સહીત રુા. ૪.૭૯ લાખના મુદામાલ સાથે ઝડપી લીધી હતી.

આ હાઇપ્રોફાઇલ જુગારની પોલીસ દફતરે જાહેર થયેલી વિગત મુજબ ભાણવડ તાલુકાના ગડુ ગામના વાડી વિસ્તારમાં રહેતા જીવાભાઇ ડાયાભાઇ કારેણા નામના ૪૨ વર્ષના શખ્સે તેના રહેણાંક મકાનમાં અંગત ફાયદા માટે નાલ ઉઘરાવી, ચલાવવામાં આવતા જુગારના અખાડા પર ગઇકાલે મંગળવારે મોડી સાંજે સ્થાનિક પોલીસે દરોડો પાડયો હતો.

આ સ્થળે ગંજીપતા વડે તિનપતી નામનો જુગાર રમી મકાન માલીકની સુખ સુવિધાનો લાભ લઇ રહેલા આશાબેન કેશુભાઇ મોઢવાડીયા (ઉ.વ.૩૨, રહે. જામનગર), શાંતાબેન પરસોતમભાઇ કાનજી શેઠીયા (ઉ.વ.૫૧, રહે. જામનગર), બુધ્ધિબેન ગોકળભાઇ રાઠોડ (ઉ.વ.૪૬, રહે. જામજોધપુર), સતીબેન દેવાયત ભીમાભાઇ ડાંગર (ઉ.વ.૪૫, રહે. જામનગર), અને સવિતાબેન માલદે ભીમાભાઇ નંદાણીયા (ઉ.વ.૪૭, રહે. જામનગર) તથા ગીતાબેન ચંપકભાઇ રામજીભાઇ વાસઝાડીયા (ઉ.વ.૪૧, રહે. જામનગર) નામના છ મહિલાઓને ઝડપી લીધા હતાં.

સ્કોર્પીયો કાર મારફતે જુગાર રમવા આવેલા આ મહિલાઓ પાસેથી પોલીસે રુા. ૭૪૮૦૦/- રોકડા તથા રુા. ચાર લાખની કાર અને છ નંગ મોબાઇલ ફોન મળી, કુલ રુા. ૪,૭૮,૮૦૦/- નો મુદામાલ કબ્જે કરી, પોલીસે સાતેય આરોપીઓ સામે જુગારધારાની કલમો હેઠળ ગુનો નોંધી, અટકાયત કરી હતી.

~ શ્રી નૂતન સૌરાષ્ટ્ર

મીઠાપુર, તા.૨૪

ભાણવડ તાબેના જંબુસર ગામની સીમમા રહેતા અરજણભાઈ નેભાભાઈ કેશવાલા નામના ૪૯ વર્ષના મેર આધેડ તેમની દૂધની ડેરીમા દૂધના મશીનની પીન બોર્ડમાં ભરાવવા જતા તેમને જોરદાર વીજ કરંટ લાગ્યો હતો. જેના કારણે અરજણભાઈનું કરુણ મૃત્યું નીપજ્યું હોવાની જાણ મૃતકના મોટાભાઈ રામદેભાઈ કેશવાલાએ ભાણવડ પોલીસને કરી છે.

વિજ પડતા યુવાનનુ મોત

ખભાળિયામા જામનગર હાઈવે નજીક કાકાભાઈ સિંહણ’ ગામે રહેતા રામભાઈ ટપુભાઈ પરમાર ગામની સિંહણ નદીના કાંંઠે હતા ત્યારે તેમના ઉપર આકાશી વિજળી પડી હતી. જેથી તેમને ગંભીર હાલતમા સીવીલ હોસ્પિટલમાં ખસેડવામાં આવેલ. જ્યાં સારવાર દરમિયાન તેમનું મૃત્યુ નીપજ્યું હતુ.

તરુણીએ ઝેરી દવા પી લેતા મૃત્યુ

ભાણવડ તાલુકાના વાનાવડ ગામે રહેતી પાયલબેન હીરાબેન વાઘેલા નામની ૧૬ વર્ષની તરુણીને છેલ્લા સાતેક વર્ષથી તાણ-આંચકીની બિમારી હોય આ બિમારીથી કંટાળી તેણીએ પોતાના હાથે જલદ ઝેરી દવા પી લેતા તેણીને વધુ સારવાર અર્થે જામનગરની જીજી હોસ્પિટલમાં ખસેડવામા આવેલ જ્યા પાયલબેનનું મૃત્યુ નીપજ્યું હતુ.

યુવાનને હાટર્એટેક

ભાણવડમાં રહેતા સુરેશભાઈ ભીખાભાઈ પરમાર નામના ૩૫ વર્ષના દેવીપૂજક યુવાનને છાતીમાં દુઃખાવો ઉપડ્યા બાદ તેમનું મૃત્યુ નીપજવાની જાણ પુનિત ભીખાભાઈ પરમારે ભાણવડ પોલીસને કરી છે.