મોટાભાગના વાલીઓએ બાળકોને સ્કૂલ મોકલવા માટે સંમતિ આપી, કેટલાકે ઓડ-ઈવન પધ્ધતિ પણ અપનાવી

0
16
Share
Share

અમદાવાદ,તા.૧૧

કોરોના મહામારી દરમિયાન ૩૦૧ દિવસના વિરામ બાદ ગુજરાતમાં આજથી શાળા-કોલેજો શરૂ થઈ. જણાવી દઈએ કે, કોરોનાના પગલે રાજ્યમા માર્ચ મહિનાથી શાળા અને કોલેજો વિદ્યાર્થીઓ માટે બંધ કરી દેવાઈ હતી અને ઓનલાઈન શિક્ષણ શરૂ કરાયું હતું. જો કે, હવે કોરોના કાબૂ આવ્યો હોવાના દાવા સાથે સરકારે આજથી ધોરણ-૧૦-૧૨ના વિદ્યાર્થીઓ સ્કૂલ તેમજ કોલેજના લાસ્ટ યરના વિદ્યાર્થીઓ માટે કોલેજ શરૂ કરાઈ છે. શાળાઓમાં સરકારની એસઓપીનું પાલન કરવા સૂચના અપાઈ છે. જે અંતર્ગત ગેટ પર શિક્ષકો અને વિદ્યાર્થીઓનું થર્મલ ગનથી ટેમ્પરેચર ચેક કરવામાં આવી રહ્યું છે. સ્કૂલ ફરીથી ખોલવા અંગે રાજ્ય સરકાર દ્વારા એસઓપી જાહેર કરવામાં આવી હતી. જેમાં સ્પષ્ટપણ જણાવવામાં આવ્યું હતું કે, વિદ્યાર્થીઓને શાળાએ મોકલવા માટે વાલીઓની સંમતિ જરૂરી છે. જેથી શાળાઓએ વાલીઓ પાસે શાળાએ આવવા માટે સંમતિ મંગાવી હતી. જેમાં મોટાભાગના વાલીઓએ બાળકોને સ્કૂલ મોકલવા માટે સંમતિ આપી હતી. ઘણી શાળાઓએ એક બેન્ચ પર એક જ વિદ્યાર્થી તેમજ નાના ક્લાસ હોય તેવી શાળાઓમાં એક ક્લાસમાં ૧૦ વિદ્યાર્થીઓને બેસાડવાનું આયોજન કરવામાં આવ્યું છે. તમને જણાવી દઈએ કે, રાજ્યમાં માર્ચ ૨૦૨૦થી કોરોનાની એન્ટ્રી બાદ પ્રથમ તબક્કામાં ૧૬ માર્ચથી ૨૯ માર્ચ સુધી શાળા-કોલેજો બંધ રાખવાની જાહેરાત કરાઈ હતી અને આ સમ દરમિયાન બોર્ડ પરીક્ષાઓ ચાલુ હોવાથી પરીક્ષા લેવાની મંજૂરી અપાઈ હતી. જોકે, કોરોનાના કેસો સતત વધતા હોવાથી શાળાઓ બંધ રાખવાની મુદ્દત લંબાવવામાં આવી હતી અને છેક દિવાળી વેકેશન સુધી શાળા-કોલેજો બંધ રાખવામાં આવી હતી. ત્યારબાદ રાજ્ય સરકાર તરફથી ૨૩ નવેમ્બરથી રાજ્યમાં ધોરણ ૯-૧૨ની શાળાઓ શરૂ કરવાની જાહેરાત કરાઈ હતી. જોકે, દિવાળી બાદ ફરી કોરોનાના કેસોમાં ઉછાલો થતાં સરકારે પોતાનો નિર્ણય પરત લેવો પડ્યો હતો. શાળાઓ શરૂ કરવા અંગે સરકાર દ્વારા આપેલી ગાઈડલાઈનનું પાલન કરવા માટે આદેશ અપાયો છે. જે મુજબ શાળાઓમાં થર્મલ ગન ઉપરાંત સેનેટાઈઝર અને સાબૂની વ્યવસ્થા પણ કરવાની રહેશે. એટલું જ નહીં, ક્લાસમાં યોગ્ય સોશિયલ ડિસ્ટન્સિંગ જળવાઈ રહે તેનું પણ ધ્યાન રાખવા માટે જણાવાયું છે. જેને પગલે શાળાઓએ તમામ વિદ્યાર્થીઓને એક સાથે બોલાવવાના બદલે ઓડ ઈવન પદ્ધતિ પણ અપનાવી છે. જેમાં ઓડ નંબરના વિદ્યાર્થીઓને ૩ દિવસ સ્કૂલ બોલાવાશે. જ્યારે ઈવન નંબરના વિદ્યાર્થીઓને ૩ દિવસ સ્કૂલ બોલાવાશે.

 

Share
Share

LEAVE A REPLY

Please enter your comment!
Please enter your name here