ભિખારીને જોઈને ડીએસપીએ પૂછપરછ કરતા તે તેમની બેચનો જ અધિકારી હોવાનું જાણવા મળતા તેઓ ચોંક્યા

0
25
Share
Share

ગ્વાલિયર, તા.૧૪

ઘણી વખત આપણે જે જોઈએ છીએ તે જેવું દેખાય તેવું હોતું નથી. ખાસ કરીને કોઈ વ્યક્તિને પહેલી નજરમાં ઓળખવામાં આપણાથી ભૂલ થઈ જતી હોય છે. મધ્ય પ્રદેશના ગ્વાલિયરમાં એક એવો જ મામલો સામે આવ્યો છે, જ્યાં બે ડીએસપી જ્યારે ફૂટપાથ પર ઠંડીમાં કાંપી રહેલા એક ભિખારીની પાસે ગયા તો ચોંકી ગયા. એ ભિખારી તેમની જ બેચનો ઓફિસર નીકળ્યો.

હકીકતમાં, ગ્વાલિયરમાં પેટચૂંટણીની મતગણતરી પછી બે ડીએસપી રત્નેશ સિંહ તોમર અને વિજય સિંહ ભદોરિયા ઝાંસી રોડ પરથી પસાર થઈ રહ્યા હતા. ત્યારે તેમને એક ભિખારી ઠંડીમાં કાંપતો જોવા મળ્યો. તેને જોઈને તેમણે પોતાની કાર રોકી અને તેની મદદ કરવા પહોંચ્યા. રત્નેશ સિંહે તેને પોતાના બૂટ અને વિજય સિંહે પોતાનું જેકેટ તેને આપી દીધું. આ દરમિયાન ભિખારીએ બંનેને તેમના નામથી બોલાવ્યા. આ સાંભળી તેમના આશ્ચર્યનો પાર ન રહ્યો. પછી તેમની વચ્ચે વાતચીત થઈ તો જે વાત જાણવા મળી તેણે તો બંને પોલીસ અધિકારીને વધુ આશ્ચર્યમાં મૂકી દીધા. તેમને જાણવા મળ્યું કે, આ ભિખારી તેમની જ બેંચના પોલીસ અધિકારી છે, જે છેલ્લા ૧૦ વર્ષથી આ રીતે ફરી રહ્યા છે. હકીકતમાં, ઝાંસી રોડ વિસ્તારમાં વર્ષોથી રસ્તા પર ભિખારી અવસ્થામાં ફરી રહેલો આ શખસ એક સમયે પોલીસ અધિકારી હતા. ૧૯૯૯ બેંચના તે અચૂક નિશાનેબાજ હતા. તેમનું નામ મનીષ મિશ્રા છે. જાણવા મળ્યા મુજબ, તે મધ્ય પ્રદેશના જુદા-જુદા પોલીસ સ્ટેશનમાં ફરજ બજાવી ચૂક્યા છે. મનીષે ૨૦૦૫ સુધી પોલીસની નોકરી કરી અને છેલ્લે તેઓ દતિયામાં પોસ્ટેડ હતા. ધીરે-ધીરે તેમની માનસિક સ્થિતિ ખરાબ થઈ ગઈ. પરિવારજનો પણ પરેશાન થઈ ગયા હતા. તેમની સારવાર માટે જ્યાં -જ્યાં તેમને લઈ જવાયા, તેઓ ત્યાંથી ભાગી ગયા. થોડા દિવસો પછી મનીષ ક્યાંક જતા રહ્યા અને પછી પરિવારને તેમના વિશે કંઈ જાણ ન હતી. તેમની પત્ની પણ તેમને છોડીને જતી રહી હતી. બાદમાં બંનેના છૂટાછેડા પણ થઈ ગયા. પછી તો મનીષની માનસિક સ્થિતિ એટલી બગડી ગઈ કે તેઓ ભીખ ભાંગવા લાગ્યા અને એ રીતે તેમણે ૧૦ વર્ષ પસાર કર્યા.

મનીષના આ બંને સાથીઓએ વિચાર્યું પણ નહતું કે, આવું પણ થઈ શકે છે. મનીષ આ બંને અધિકારીઓ સાથે વર્ષ ૧૯૯૯માં પોલીસ સબ ઈન્સ્પેક્ટરની પોસ્ટ પર ભરતી થયા હતા. ભિખારીની સાચી ઓળખ થયા બાદ બંને પોલીસ અધિકારીઓએ તેમની સાથે જૂના દિવસોની વાત કરવાનો પ્રયાસ કર્યો અને સાથે લઈ જવાની વાત કરી,પરંતુ તે સાથે જવા રાજી ન થયા. તે પછી બંને અધિકારીઓએ મનીષને એક સમાજસેવી સંસ્થામાં મોકલી આપ્યા. ત્યાં મનીષ દેખરેખ શર થઈ ગઈ છે.

ઉલ્લેખનીય છે કે, મનીષના ભાઈ પણ પોલીસમાં છે. તેમના પિતા અને કાકા એસએસપી પદેથી રિટાયર થયા છે. જાણવા તો એવું પણ મળ્યું છે કે, તેમની એક બહેન કોઈ એમ્બેસીમાં સારી પોસ્ટ પર કામ કરે છે. મનીષના પત્ની કે જેમની સાથે છૂટાછેડા થઈ ગયા છે તે પણ જ્યુડિશિયલ ડિપાર્ટમેન્ટમાં કામ કરે છે. હાલ, તો મનીષના આ બંને મિત્રોએ તેમની સારવાર ફરીથી શરૂ કરાવી દીધી છે. પણ, એક સમયના અચૂક નિશાનેબાજ અને એથ્લીટ એવા આ પોલીસ અધિકારીની આવી દશા વિશે જાણીને બધાને આશ્ચર્યમાં મૂકાઈ ગયા છે.

 

Share
Share

LEAVE A REPLY

Please enter your comment!
Please enter your name here