ભારતીય ટીમમાં ઇજાગ્રસ્તોની લાઇન લાગીઃ બ્રિસબેન ટેસ્ટ પડકાર બન્યો

0
19
Share
Share

ન્યુ દિલ્હી,તા.૧૨

ઓસ્ટ્રેલિયાની સામે વર્તમાન સીરીઝ ભારત માટે અત્યાર સુધી સારી પણ રહી છે અને ખરાબ પણ. એક તરફ ભારતને વન-ડે સીરિઝમાં હારનો સામનો કરવો પડ્યો તો ટી-૨૦ સીરિઝમાં જીત મળી. તે પછી ટેસ્ટ સીરિઝમાં એક પછી એક ખેલાડીને ઈજાનો સામનો કરવો પડ્યો. ટેસ્ટ સીરિઝની ત્રણ મેચો પછી સ્થિતિ એવી છે કે, હવે બ્રિસબેનના ગાબા સ્ટેડિયમમાં રમાનારી ચોથી ટેસ્ટ મેચ માટે તેની સામે મુશ્કેલી ઊભી થઈ ગઈ છે કે ફાઈનલ ઈલેવનમાં કોને તક આપવી કે જેથી સીરિઝ ગુમાવવાનો વારો ન આવે.

ટેસ્ટ સીરિઝની પહેલી મેચ રમ્યા બાદ વિરાટ કોહલી પેટરનિટી લીવ પર સ્વદેશ પાછો આવ્યો. તે પછી અજિંક્ય રહાણેએ ટીમની કેપ્ટનશીપ સંભાળી.. વિરાટના ઘરે હાલ દીકરીનો જન્મ થયો છે. ભારત ઓપનર લોકેશ રાહુલ પણ ઈજાગ્રસ્ત થઈ ગયો છે અને તેને પણ સ્વદેશ પાછા આવવું પડ્યું છે. તે ટેસ્ટ સીરિઝમાં એક મેચ પણ ન રમી શક્યો.

રવિન્દ્ર જાડેજા આંગળીમાં ઈજા છતાં ત્રીજી ટેસ્ટ મેચ રમ્યો, પરંતુ તે ચોથી ટેસ્ટમાં ટીમમાં નહીં હોય. એટલું જ નહીં, ઓપનર મયંક અગ્રવાલનું રમવાનું પણ નિશ્ચિત નથી. પ્રેક્ટિસ દરમિયાન હાથમાં ઈજા થઈ છે અને તેને હેરલાઈન ફ્રેક્ચર હોઈ શકે છે.

સિડની ટેસ્ટ દરમિયાન છેલ્લા દિવસે સાડા ત્રણ કલાકની બેટિંગ પછી રવિચંદ્રન અશ્વિનની પીઠની સમસ્યા પણ વધી ગઈ છે. જોકે, એવી આશા છે કે, તે ૧૫ જાન્યુઆરીથી શરૂ થનારી આગામી ટેસ્ટ મેચમાં રમી શકે છે.

ભારતીય બોલિંગ આક્રમણના મહત્વના સભ્ય જસપ્રીત બુમરાહના પણ સ્નાયુ ખેંચાઈ ગયા છે અને તેના સ્કેન રિપોર્ટ બાદ ભારતીય મેનેજમેન્ટ ઈંગ્લેન્ડ સામેની ચાર ટેસ્ટની આગામી સીરિઝને જોતા કોઈ જોખમ લેવા નથી માગતું. આશા રાખવામાં આવી રહી છે કે, બે ટેસ્ટ રમનારો મોહમ્મદ સિરાજ ભારતીય ફાસ્ટ બોલિંગ આક્રમણની આગેવાની કરશે. બ્રિસબેન ટેસ્ટમાં નવદીપ સૈની અને ટી નટરાજન તેનો સાથે આપતા જોવા મળી શકે છે.

ભારતીય ટીમમાં સમસ્યા એ છે કે, ઈજાગ્રસ્ત લોકેશ રાહુલ જવાથી અને હનુમા વિહારીની ગ્રેડ ૨ ઈજા બાદ મીડલ ઓર્ડરમાં વિકલ્પ નથી બચ્યા. જોવાનું એ રહેશે કે મુખ્ય ખેલાડીઓની ગેરહાજરીમાં અને લાંબા પૂંછડિયા ક્રમને જોતાં ભારત છ બેટ્‌સમેનો અને ચાર બોલરોની સાથે ઉતરવાનો નિર્ણય કરે છે કે નહીં

અનુભવી પેસર ઈશાંત શર્મા અને ભુવનેશ્વર કુમાર પહેલા જ સીરિઝની બહાર થઈ ચૂક્યા છે. તે ઉપરાંત ઉમેશ યાદવ પણ ઈજાના કારણે બહાર છે, જેના ઘરે હાલમાં જ દીકરીનો જન્મ થયો છે.

ભારત અને ઓસ્ટ્રેલિયાની વચ્ચે ટેસ્ટ સીરિઝ હાલ ૧-૧ની બરાબરી પર છે. ટીમ ઈન્ડિયાને જ્યાં એડિલેડમાં ત્રીજા દિવસે જ હારનો સામનો કરવો પડ્યો હતો, તો મેલબર્નમાં બીજી ટેસ્ટ જીતી અને ત્રીજી ડ્રો રહી.

બ્રિસબેનમાં કઈ હોઈ શકે છે ભારતની પ્લેઈંગ ઈલેવનઃ-

શુભમન ગિલ, રોહિત શર્મા, પૃથ્વી શો, ચેતેશ્વર પુજારા, અજિંક્ય રહાણે, રિષભ પંત, રવિચંદ્રન અશ્વિન, શાર્દુલ ઠાકુર, નવદીપ સૈની, મોહમ્મદ સિરાજ અને ટી નટરાજન.

 

Share
Share

LEAVE A REPLY

Please enter your comment!
Please enter your name here